◾ गया (बिहार) | प्रतिनिधी – विनोद विरोधी
बिहार राज्यातील गया जिल्ह्यातील मोहनपूर प्रखंड अंतर्गत सिरियावां ग्रामपंचायतीच्या लालपूर गावाला स्वातंत्र्याच्या ७९ वर्षांनंतरही पक्क्या रस्त्याची सुविधा उपलब्ध झालेली नाही. पावसाळ्यात गावातील मुख्य रस्ता पूर्णपणे चिखलमय व पाण्याखाली जात असल्याने ग्रामस्थांना पायी चालणेही अत्यंत कठीण होत आहे.
ग्रामस्थांच्या म्हणण्यानुसार, रस्ता बांधकामासाठी आमदार, खासदार, जिल्हाधिकारी तसेच संबंधित विभागाकडे शेकडो वेळा निवेदने देण्यात आली आहेत. मात्र, आजपर्यंत कोणतीही ठोस कार्यवाही झालेली नाही. अनेक वर्षांपासून केवळ आश्वासनांवरच बोळवण होत असून रस्त्याची अवस्था दिवसेंदिवस अधिकच बिकट होत आहे.
या रस्त्याचा लाभ परिसरातील सुमारे ५ ते ६ गावांतील जवळपास १० हजार नागरिकांना होणार आहे. निवडणुकांच्या काळात लोकप्रतिनिधी रस्ता बांधून देण्याचे आश्वासन देतात; मात्र निवडणुका संपल्यानंतर या प्रश्नाकडे दुर्लक्ष केले जाते, असा आरोप ग्रामस्थांनी केला आहे.
रस्त्याच्या दयनीय अवस्थेमुळे शालेय विद्यार्थी, ज्येष्ठ नागरिक, गर्भवती महिला आणि आजारी रुग्णांना मोठ्या अडचणींचा सामना करावा लागत आहे. पावसाळ्यात रुग्णवाहिका तसेच इतर वाहने गावात पोहोचू शकत नसल्याने आपत्कालीन परिस्थितीत गंभीर समस्या निर्माण होत आहेत.
ग्रामस्थांनी प्रशासन आणि लोकप्रतिनिधींना लालपूर गावाचा रस्ता तातडीने मंजूर करून त्याचे बांधकाम सुरू करण्याची मागणी केली आहे. अन्यथा, लवकरच लोकशाही मार्गाने तीव्र आंदोलन छेडण्याचा इशाराही ग्रामस्थांनी दिला आहे.