हिरापुरा परिसरात पिण्याच्या पाण्यासाठी हाहाकार! आठ महिन्यांपासून मातंग समाजाची पाण्यासाठी भटकंती
नगराध्यक्ष रूपाली मातने यांनी सुरू केलेल्या पाइपलाइनच्या कामाला काही नगरसेवकांचा विरोध; पाइपलाइन टाकूनही टी-जोडणी रखडल्याने नागरिकांमध्ये तीव्र नाराजी
Gavakadachibatmi network
अचलपूर : अचलपूर शहरातील हिरापुरा परिसरात मागील आठ महिन्यांपासून पिण्याच्या पाण्याची गंभीर समस्या निर्माण झाली असून, विशेषतः मातंग समाजातील नागरिकांना पाण्यासाठी वणवण भटकावे लागत आहे. पिण्याचे पाणी ही प्रत्येक नागरिकाची मूलभूत गरज असताना, एवढ्या दीर्घकाळापासून नागरिकांना पाण्यासाठी संघर्ष करावा लागत असल्याने परिसरात तीव्र नाराजी व्यक्त केली जात आहे.
मिळालेल्या माहितीनुसार, हिरापुरा परिसरातील पाणीटंचाईची समस्या लक्षात घेऊन नगराध्यक्ष रूपाली मातने यांनी नागरिकांना दिलासा देण्यासाठी पाइपलाइन टाकण्याचे काम सुरू केले होते. मात्र, पाइपलाइन टाकल्यानंतरही अद्याप टी-जोडणी करण्यात आलेली नाही. त्यामुळे पाइपलाइनचे काम होऊनसुद्धा नागरिकांना पाण्याचा लाभ मिळू शकलेला नाही. परिणामी, मागील आठ महिन्यांपासून नागरिकांना पाण्यासाठी इतरत्र भटकंती करावी लागत आहे.
दरम्यान, नगरपरिषदेच्या सर्वसाधारण सभेत या पाइपलाइनच्या कामावरून काही नगरसेवकांनी आक्षेप घेतल्याची माहिती समोर आली आहे. सुरेंद्र तांबे, राज पाटील, जलील पठाण, असलम बंजारा, ममता गोरे आणि विजू थावाणी या नगरसेवकांनी कामासंदर्भात प्रथम कामाचे स्टेटमेंट तयार करावे, त्यानंतर नियमानुसार अंदाजपत्रक व निविदा प्रक्रिया पूर्ण करून ती ऑनलाइन करावी आणि त्यानंतरच काम करण्यात यावे, अशी भूमिका सभेत मांडल्याचे सांगण्यात येत आहे.
या प्रक्रियेमुळे संबंधित काम थांबविण्यात आल्याचे सांगितले जात असून, ठेकेदारानेही काम बंद केल्यामुळे पाइपलाइनची टी-जोडणी रखडली आहे. मात्र, या प्रशासकीय वादात सर्वसामान्य नागरिकांना पाण्याच्या संकटाला सामोरे जावे लागत आहे.
नियम महत्त्वाचे की नागरिकांचे पिण्याचे पाणी?
विकासकामांमध्ये अंदाजपत्रक, प्रशासकीय मान्यता आणि निविदा प्रक्रिया यांना निश्चितच महत्त्व आहे. मात्र, पिण्याच्या पाण्यासारख्या अत्यावश्यक सुविधेच्या बाबतीत नागरिकांना आणखी तीन ते चार महिने प्रतीक्षा करायला लावणे योग्य आहे का, असा सवाल आता उपस्थित होत आहे. आवश्यक प्रक्रिया पूर्ण करण्यासाठी प्रशासनाने वेगाने कार्यवाही करावी आणि नागरिकांना तातडीने पाणी उपलब्ध करून द्यावे, अशी मागणी होत आहे.
नगराध्यक्ष रूपाली मातने यांनी हिरापुरा परिसरातील पाणीप्रश्न सोडविण्यासाठी पुढाकार घेतला होता. मात्र, काही नगरसेवकांच्या विरोधामुळे विकासकामांना अडथळे निर्माण होत असल्याचा आरोप नागरिकांकडून केला जात आहे. नगराध्यक्ष आणि नगरसेवक यांच्यातील राजकीय मतभेद किंवा कामकाजासंदर्भातील मतभिन्नता याचा फटका सर्वसामान्य नागरिकांना का बसावा, असा प्रश्नही उपस्थित केला जात आहे.
नगराध्यक्षांच्या बदनामीपेक्षा शहराच्या विकासाकडे लक्ष द्या!
अचलपूर शहराच्या विकासासाठी नगराध्यक्ष, नगरसेवक आणि नगरपरिषद प्रशासन यांनी एकत्रितपणे काम करणे अपेक्षित आहे. मात्र, विकासकामांवरून होणारे मतभेद आणि आरोप-प्रत्यारोप यामुळे शहरातील मूलभूत प्रश्न प्रलंबित राहणार असतील, तर अचलपूरचा विकास कधी होणार, असा संतप्त सवाल नागरिकांकडून उपस्थित केला जात आहे.
नगराध्यक्षांची बदनामी करण्यापेक्षा शहरातील पाणीपुरवठा, रस्ते, स्वच्छता आणि इतर मूलभूत सुविधांच्या प्रश्नांकडे लक्ष देण्याची गरज असल्याची भावना नागरिकांमध्ये व्यक्त होत आहे.
प्रशासनाने तातडीने हस्तक्षेप करावा
हिरापुरा परिसरातील मातंग समाजासह इतर नागरिकांची पाण्यासाठी सुरू असलेली भटकंती थांबविण्यासाठी नगरपरिषद प्रशासनाने तातडीने हस्तक्षेप करावा. पाइपलाइनची प्रलंबित टी-जोडणी पूर्ण करून नियमित पाणीपुरवठा सुरू करावा. तसेच, कामासंदर्भातील आवश्यक तांत्रिक व प्रशासकीय प्रक्रिया तातडीने पूर्ण करावी, अशी जोरदार मागणी परिसरातील नागरिकांकडून होत आहे.
पिण्याचे पाणी हा राजकारणाचा विषय नसून तो नागरिकांच्या जीवनाशी निगडित मूलभूत प्रश्न आहे. त्यामुळे राजकीय मतभेद बाजूला ठेवून हिरापुरा परिसरातील पाणीटंचाईचा प्रश्न त्वरित सोडविणे हीच काळाची गरज आहे.