सोमवार आणि गुरुवार सुरू राहण्याचा फलक; प्रत्यक्षात दवाखाना बंद असल्याने पशुपालकांमध्ये नाराजी
सिंदखेड : माहूर तालुक्यातील सिंदखेड येथील पशुवैद्यकीय दवाखाना सोमवारी बंद अवस्थेत आढळून आल्याने पशुपालकांमधून नाराजी व्यक्त होत आहे. दवाखान्याच्या भिंतीवर लावलेल्या सूचनाफलकावर सोमवार आणि गुरुवार या दोन दिवशी दवाखाना सुरू राहील, असे नमूद करण्यात आले आहे. मात्र, सोमवारीही दवाखान्याला कुलूप असल्याचे निदर्शनास आल्याने या वेळापत्रकाच्या अंमलबजावणीवर प्रश्नचिन्ह निर्माण झाले आहे.
संबंधित नागरिकाने सोमवारी दवाखान्यात भेट दिली असता, इमारतीला कुलूप लावलेले असल्याचे आढळून आले. आठवड्यातून केवळ दोन दिवस दवाखाना सुरू राहणार असल्याचे नमूद असताना, त्याच दिवशी दवाखाना बंद असल्यास जनावरांवर उपचार करून घ्यायचे कुठे, असा प्रश्न पशुपालकांसमोर निर्माण झाला आहे.
ग्रामीण भागात शेतीसोबत पशुपालन हा अनेक कुटुंबांच्या उदरनिर्वाहाचा महत्त्वाचा आधार आहे. जनावरे आजारी पडल्यास त्यांच्यावर वेळेत उपचार होणे आवश्यक असते. मात्र, पशुवैद्यकीय सेवा वेळेवर उपलब्ध न झाल्यास पशुपालकांना आर्थिक नुकसान सहन करावे लागू शकते.
या पार्श्वभूमीवर संबंधित पशुवैद्यकीय विभागाच्या वरिष्ठ अधिकाऱ्यांनी या प्रकाराची चौकशी करून दवाखाना बंद असण्यामागील कारण स्पष्ट करावे. तसेच, जाहीर केलेल्या वेळापत्रकानुसार दवाखाना नियमित सुरू ठेवून पशुपालकांना आवश्यक पशुवैद्यकीय सेवा उपलब्ध करून द्यावी, अशी मागणी नागरिकांकडून होत आहे.
आता या प्रकाराची संबंधित विभागाचे वरिष्ठ अधिकारी दखल घेऊन आवश्यक कार्यवाही करतात का, याकडे सिंदखेड येथील पशुपालकांचे लक्ष लागले आहे.