पुणे, प्रतिनिधी : मुख्यमंत्री माझी लाडकी बहीण योजनेत तब्बल ८० लाख महिला अपात्र असल्याचे राज्य सरकारने मान्य केल्यानंतर या प्रकरणावरून राजकीय वातावरण तापले आहे. आम आदमी पार्टीचे राज्य प्रवक्ते व पुणे कोथरूड अध्यक्ष मुकुंद किर्दत यांनी या योजनेला महाराष्ट्राच्या इतिहासातील "सर्वात मोठा निवडणूकपूर्व घोटाळा" असल्याचा आरोप करत मुख्यमंत्री Devendra Fadnavis यांना अनेक प्रश्न उपस्थित केले आहेत.
मंत्री आदिती तटकरे यांनी योजनेतील ८० लाख महिला अपात्र असल्याचे मान्य केल्याचा दावा करत किर्दत यांनी सांगितले की, लाभार्थ्यांकडून वसुली हा मुख्य मुद्दा नसून चुकीच्या पद्धतीने निधी वितरित करणाऱ्या मंत्री व प्रशासनावर कारवाई होणे अधिक महत्त्वाचे आहे. या प्रकरणात आर्थिक गुन्हे दाखल करण्याची मागणीही त्यांनी केली आहे.
किर्दत यांनी उपस्थित केलेल्या प्रमुख प्रश्नांमध्ये अपात्र लाभार्थींना वितरित झालेल्या निधीची एकूण रक्कम किती, अर्ज छाननीसाठी तरतूद असूनही पडताळणी का झाली नाही, तसेच साडेचार लाखांहून अधिक सरकारी कर्मचाऱ्यांच्या नातेवाईकांनी योजनेचा लाभ घेतल्यास त्यांच्यावर फसवणुकीची कारवाई होणार का, यांचा समावेश आहे.
तसेच शेतकरी कर्जमाफी व शालेय विद्यार्थ्यांच्या योजनांमध्ये त्रिस्तरीय पडताळणी केली जाते, मात्र लाडकी बहीण योजनेत ही प्रक्रिया शिथिल का करण्यात आली, असा सवालही त्यांनी उपस्थित केला. मुख्यमंत्री फडणवीस यांनी योजनेची अंमलबजावणी घाईत करणे आवश्यक होते असे म्हटले असले, तरी ती घाई नेमकी कशासाठी होती याचे स्पष्ट उत्तर द्यावे, अशी मागणी किर्दत यांनी केली.
योजनेतील कथित गैरव्यवहारासाठी संबंधित मंत्री व प्रशासन जबाबदार नाही का, तसेच लाभार्थींची पडताळणी न करता यापूर्वी कोणत्या योजनांचे पैसे वितरित करण्यात आले आहेत, याची माहिती सरकारने जाहीर करावी, असेही त्यांनी म्हटले आहे.
दरम्यान, या प्रकरणाची "पोलखोल" करण्याचा इशाराही आम आदमी पार्टीने दिला असून, लाडकी बहीण योजनेतील अपात्र लाभार्थी आणि निधी वितरणाबाबतचा वाद आगामी काळात आणखी तीव्र होण्याची शक्यता आहे.