ढोल-ताशांच्या गजरात विसर्जन मिरवणूक; बाराही गणेश मंडळांचा सहभाग
श्रीक्षेत्र माहूर : दरवर्षीप्रमाणे यंदाही श्रीक्षेत्र माहूर शहरातील विविध भागांतील परवानाधारक १२ गणेश मंडळांच्या गणेशमूर्तींचे भक्तीमय वातावरणात विसर्जन करण्यात आले. ढोल-ताशे, पारंपरिक वाद्यांच्या गजरात निघालेल्या विसर्जन मिरवणुकीत तरुणाई मोठ्या उत्साहाने सहभागी झाली होती. ‘गणपती बाप्पा मोरया, पुढच्या वर्षी लवकर या’, ‘आमचा गणपती जातो ना, पुढच्या वर्षी येतो ना’, ‘गजानन महाराज की जय’ अशा घोषणांनी शहरातील प्रमुख मार्ग दुमदुमून गेले.
यावर्षी शहरातील विविध प्रभागांत १२ गणेश मंडळांतर्फे गणेशमूर्तींची विधिवत स्थापना करण्यात आली होती. दहा दिवसांच्या उत्सव काळात दोन्ही वेळा अभिषेक, महाआरती व नैवेद्य अर्पण करण्यात आला. तसेच विविध सांस्कृतिक व धार्मिक कार्यक्रमांसह अन्नदान आणि महाप्रसादाचे आयोजन करण्यात आले होते.
२६ सप्टेंबर २०२६ रोजी पोर्णिमेच्या दिवशी दुपारी ४ वाजता शहरातील बाराही गणेश मंडळांच्या विसर्जन मिरवणुकीला डॉ. बाबासाहेब आंबेडकर चौकातून सुरुवात झाली. मिरवणुकीत गणेशभक्त मोठ्या संख्येने सहभागी झाले होते.
छत्रपती शिवाजी महाराज चौकात भारतीय जनता पक्षातर्फे गणेशभक्तांसाठी शुद्ध पिण्याच्या पाण्याची व्यवस्था करण्यात आली होती. यावेळी भाजपा तालुकाध्यक्ष निळकंठ मस्के, शहराध्यक्ष तथा नगरसेवक गोपु महामुने, पदाधिकारी व कार्यकर्ते उपस्थित होते. भाजपा नेते ॲड. रमण जायभाये व रुग्ण कल्याण समिती सदस्य अनिल वाघमारे यांच्या हस्ते गणेशपूजन करण्यात आले. तसेच गणेश मंडळांच्या अध्यक्षांचे श्रीरामाची प्रतिमा, शाल व पुष्पहार देऊन स्वागत करण्यात आले.
महाविकास आघाडीतर्फे शिवसेना उद्धव बाळासाहेब ठाकरे गटाचे तालुकाप्रमुख जितु चोले, युवासेना जिल्हाध्यक्ष यश खराटे व नगराध्यक्ष फिरोज दोसानी यांच्या उपस्थितीत गणेश मंडळांचे स्वागत करण्यात आले. नवयुवक गणेश मंडळातर्फे गणेशभक्तांसाठी पोहे, चणे व पिण्याच्या पाण्याची व्यवस्था करण्यात आली होती.
यावर्षी वन कार्यालयातील गणेशमूर्तीच्या विसर्जन मिरवणुकीत वनपरिक्षेत्र अधिकारी रोहित जाधव यांच्यासह वन विभागाचे कर्मचारी पारंपरिक वेशभूषेत सहभागी झाले होते.
वैनगंगा नदीपात्रातील विसर्जनस्थळी शारदा कन्स्ट्रक्शन कंपनीतर्फे क्रेन मशीनची व्यवस्था करण्यात आली होती. नगरपंचायत प्रशासनाने प्रकाश व्यवस्था, जीवरक्षक, अग्निशमन वाहन तसेच आवश्यक कर्मचारी नियुक्त केले होते. त्यामुळे विसर्जन प्रक्रिया सुरळीत पार पडली आणि कोणतीही अनुचित घटना घडली नाही.
उपविभागीय पोलीस अधिकारी किरणकुमार भोंडवे यांच्या मार्गदर्शनाखाली देविदास चोपडे व पोलीस पथकाने विसर्जन मिरवणुकीदरम्यान चोख पोलीस बंदोबस्त ठेवला होता.
भक्तिमय वातावरणात ‘गणपती बाप्पा मोरया, पुढच्या वर्षी लवकर या’च्या जयघोषात माहूरकरांनी आपल्या लाडक्या बाप्पाला भावपूर्ण निरोप दिला.
