जिल्ह्यात अपघात रोखण्यासाठी ब्लॅकस्पॉटवर गतिरोधक (speed breakers) बसविण्यात येतात. मात्र, काही ठिकाणी ते अवैज्ञानिक पद्धतीने बसविण्यात आले आहेत. हे गतिरोधक वाहनधारकांना त्रासदायक ठरत असल्याने ते तातडीने हटविण्यात यावेत, असे निर्देश जिल्हाधिकारी आशिष येरेकर यांनी दिले आहेत.
तसेच, वाहनांवर प्रखर उजेड करणाऱ्या हाय बीम लाईटवर कडक कारवाई करण्याचे आदेश त्यांनी दिले आहेत. प्रखर उजेड असणारी हाय बीम लाईट लावण्यात येत आहे, ज्यामुळे समोरील वाहनचालकाची दृश्यमानता कमी होऊन अपघात होत आहेत. यावर पोलीस आणि प्रादेशिक परिवहन विभागाने (RTO) संयुक्तपणे मोहीम राबवून कारवाई करावी. तसेच, सायलेन्सरमध्ये बदल करून जोरात आवाज करणाऱ्या दुचाकी वाहनांवरही पोलिसांनी कारवाई करावी, असेही जिल्हाधिकारी आशिष येरेकर यांनी स्पष्ट केले आहे.
रस्ते अपघात रोखण्यासाठी विविध उपाययोजना करण्यात येत आहेत. नवीन तयार करण्यात येणारे गतिरोधक वाहनांच्या अपघातास कारणीभूत ठरू नयेत, यासाठी ते ठरवून दिलेल्या मानकानुसारच (standards) तयार करण्यात यावेत. तसेच, वाहनचालकांना लांबून कळावे यासाठी गतिरोधकावर पांढरे पट्टे ओढण्यात यावेत, अशा सूचना जिल्हाधिकाऱ्यांनी दिल्या आहेत.